საქართველოს ფეხბურთის ფედერაციისა და თბილისის მერიის ორგანიზებით, 21 სექტემბერს, ქართული და მსოფლიო ფეხბურთის ვარსკვლავების დაპირისპირება შედგება. მიხეილ მესხის სახელობის სტადიონზე ერთმანეთს საქართველოს ნაკრებისა და მილანის ლეგენდები შეხვდებიან.
საქართველოს ფეხბურთის ფედერაციის გენერალური მდივნის, დავით მუჯირის განცხადებით, მატჩის მიმართ ქომაგების ინტერესი ძალიან დიდია.
,,ძალიან მნიშვნელოვანია ინტერესი, რომელიც 12:00 საათიდან, ბილეთების გაყიდვის შემდეგ გამოიკვეთა. პირველ 45 წუთში 5000-ზე მეტი ბილეთი გაიყიდა. მინდა, მოვუწოდო ქართველ გულშემატკივარს, ის ფეხბურთელები, რომლებიც წლების განმავლობაში ახარებდნენ მათ, მხარი დაუჭირონ. საკმაოდ ძლიერი მოწინააღმდეგე იქნება მილანი. ძლიერი და ვარსკვლავური შემადგენლობით გვესტუმრება – კაკა, კაფუ, ზეედორფი და ყველა ის ვარსკვლავი, რომელიც მილანისა და ქართული ფეხბურთის ქომაგებს უყვარდათ. კახა კალაძესთან ერთად, ორჯერ მოიპოვეს ჩემპიონთა ლიგა. ჩვენი გუნდიც ძლიერი შემადგენლობით იქნება წარმოდგენილი”, – განაცხადა დავით მუჯირმა.
